كابلي قال أنا زولة صوتى ملائكى وعشان كده قاموا سمونى نبوية الملاك
مفروض أكون مهندسة وغير «الطيور» ما في صورة مخزنة في ذاكرتى
اتونس معاها: وليد كمال
على الرغم من حداثة عمرها

وقصر مشوارها في شارع الفن السوداني ده، الا انه البت دي قدرت بموهبتها
انها تكوِّن شخصيتها الفنية المستقلة و تنفذ بصوتها «برااااحة» لدواخل الناس.. لدرجة انه سفير الفن والنوايا الحسنة الكابلي من شدة ما عجبو صوتها وصف صوتها بالملائكي... لاقيناها استجابةً لنبض جمهورها واتونسنا معاها الونسة دي بعفوية وبدون رتوش كمان... كدي تعالوا نقرب ليها اكتر واكتر..
! كدي ورينا بالضبط انتي منو
- انا نبوية عبد الحفيظ احمد عبد الرحمن.. ولدونى فى السابع عشر من نوفمبر 1982واتربيت في ربوع ام در بحي ابو روف العريق، ودرست واتشكلت «حلوه اتشكلت دي مش» في مدارس معهد النور ببحرى الخاصة بتأهيل المكفوفين وبعدين مشيت مدرسة ملازمين الثانوية، وبعدين جامعة الاتخرجت فيها من كلية الاعلام، وحاليا بستعد للتحضير لنيل درجة الماجستير.
! والملاك دى جات من وين
- استاذ كابلي قال نبوية دي صوتها ملائكي.. وبعدين ناس استديو سارة قاموا ثبتوا التسمية. الاستاذ جمال تيرو قال نبوية دي نسميها نبوية الملاك، يمكن عشان انا زولة هادئة وما بتكلم كثير سموني الملاك.
! متين عرفتى إنك فنانة؟
- ما كنت مخططة اكون فنانة، كنت بدندن مع اخواتى
من بدري في الثمانينيات خالي كان عازف عود وصاحب الفنان عبد العزيز العميري الذي كان يقيم معنا. وفي مرة سافرت معهم نيالا في رحلة امتدت شهوراً وهناك غنيت.. ومن هنا اكتشفت الفنان الجواي. لكن البداية الجادة كانت 2002م، كنت بمشي مسجد الشيخ قريب الله وبسمع النسوان بيمدحن وبشيل معاهن.. عرضو علىَّ فكرة تسجيل البوم مدائح أخذت الفكرة بعدم جدية، لانو حتة بت عند أهلنا تقوم تمدح او تغني صعبة.. الفكرة المترسخة عن الوسط الفنى مزعجة، لكن اى زول فى المجتمع معرض للتعامل مع ناس كويسين والعكس المهم، ودوني شركة مآب وهم حولونى لسارة، وكان اول تعاون شريط مدائح «ناوى القومة» يومها كنت فى الثانوى، وما كنت مؤملة انو ناس بيتنا يسمحوا لي اغني.. بعد داك قالوا لي خلاص غني انتي زولة علاقتك بالحقيبة جميلة، وبعد نضال واقناع كم زول استطعت في شهر يوليو 2002م اجازة صوتي بالمصنفات الفنية، وطلعت للناس البومي الاول الحلوة. ووجدت المساندة والتشجيع من ست الحبايب امي
وبعداك غنيت عااادي يعنى !!؟
اول حفلة كانت فى مركز الربيع يوم 29 اغسطس 2002م بعد ما شاركت فى برنامج اصوات وانامل، كانت المناسبة تكريم لدكتور الشوش وحاضرين عمالقة على شمو والماحى سليمان، كنت خايفة كل ما اختار اغنية اقول لالا، فى النهاية اخترت اغنية «اجلى النظر يا صاح» استقبال الحضور فى البداية كان عادى وبعدين طرب.
الحفل الآخر كان على ما اذكر في جامعة الامام الهادي على هامش ندوة بعنوان نساء فوق العادة.. كنت مع الاستاذ حمد الريح، فكرة انك تغني مع زول زي استاذ حمد وسط جمهور عريض كانت صعبة، وكان بيدور في دواخلي صراع هل حا انجح والجمهور حيقبل نبوية ام.. واخيراً وصلت لقناعة خوض التجربة وطلعت المسرح واتجاوزت وجود الجمهور وحمد وبقيت اغني عادي كأني في بيتنا ونجحت، اما اول اغنية فهى «الحلوة» الحان صلاح جميل.
كمية الثقة التى توفرت لى كانت كبيرة يوم21/7/2000م دخلت الاستديو لاجازة صوتى.. اللجنة كان فيها دكتور الماحى سليمان وانس العاقب.. فى الاغنية الاولى كان فى جمود فى الثانية استاذ الماحى صفق لى.. المهم المعاينة انتهت والنتيجة ظهرت بعد فترة من القلق والانتظار وتمت اجازة صوتى.
* أول عداد؟
- حصلت على ثلاثة مليون جنيه كاول عائد من الغناء نظير البومى الاول بتاع المدائح من شركة سارة.
عملتى بيهم شنو؟
- مسألة القروش دى ما كانت مهمة بالنسبة لى، اشتريت اول جهاز سى دى روم واسطوانات بتاعت مزيكة لاغانى عربية وغربية واشرطة سودانية، وعملت حاجات تانية نسيتها.
بتختارى أعمالك كيف؟
- معايير اختيار الاعمال الفنية وعدد الاغنيات الخاصة يخضع للاحساس والعقل، لو اللحن والكلمات ما اطربتني وحسيتها ما بغني، بعد داك بسمع مقترحات الناس وبعمل «فلترة» للعمل، كل كلمة وترها لازم يرن في قلبي، ووجدان المستمع حتى الآن لدي عشرات الاغنيات الخاصة في جزء سمعه المستمع وجزء آخر لسه ميزان اختيارى واحد انو الاغنية تطربنى انا اول، عموما انا ما بشتغل عمل اقل من من امكانيتى ولا اعلى منها.
* رصيدك من الالبومات؟!!
- تعاملي مع فكرة الغنا منذ بداياتي لا يقوم على «المجازفة» البومي الاول «الحلوة» لم يحتو على اعمال خاصة كثيرة.. كنت عايزة الناس تستوعب اولاً خامة صوتي يومها - كنت طالبة في الثانوية وصوتي لم يكتمل تكوينه، وحتى الآن كان ادائي وسط.. توقفت بعدها لبعض الوقت، كنت خائفة هل سيتقبل الجمهور الالبوم ام لا؟
في البوم مشتهى الانظار كنت عارفة انا بعمل في شنو، رغم انه عمل مركب ومعقد، وهو من كلمات الاستاذ الطاهر ابراهيم تعاملت معه بإحساس مختلف، وقدمت الى جانبه اعمالاً خفيفة.. مجنونة حسن الزبير والحان الماحي سليمان انتاج مشتهى تم بعد سبعة شهور من القلق والتعديل.
دائماً بحب اعرف الجمهور عايز شنو وأفاجئه، عشان كده عملت البوم بالعود اسمه ملك الجمال، استعرضت فيه قدراتى الصوتية، وبعد داك جاء البوم راجياك الذى يمتاز بالبساطة فى الاداء ثم البوم جاء( دايرنك تعال) .
طيب البومك الجاى اسمه شنو وطالع متين ؟!
- البومى الجاى يستوى على نار هادئة لكن حيكون مجازفة لانو معظم الأعمال الفيهو خاصة، وانا لسه بفتكر انى فنانة صغيرة
* وفقدان نعمة البصر شنو حكايتو معاك؟
- وانا صغيرة كنت بشوف احسن لحدى ما كان عمرى ستة سنين بعد داك ابتديت احس بانو نظرى بيضعف. وفى سن العاشرة فقدته تماما.. اذكر يومها كنت بلعب مع اولاد خالتى وحسيت انى ما قادرة اشوف ويمكن عشان كده الحاجة دي ما فرقت معاي لانها جاتنى بالتدريج.
واتعاملتى مع الموضوع ده كيف؟
- شوف يا وليد اذا انا قمت اتعقدت وما اتعايشت مع الواقع ده حا افقد الاستمتاع بروعة الحياة، من انا صغيرة قررت أعيش حياتي لعبت مع الاطفال وابتديت اعرف الحاجات الحولي باحساسي الداخلي، وكنت حتى لما بحس اني ما قادرة اعمل بعض الحاجات واني متفوقة في المواد العلمية، وكان ممكن اكون مهندسة او دكتورة بقول لنفسي طيب ما انا بغنائي بعالج الناس نفسياً، بالفهم دا قدرت اخلق جواي انسانة طموحة، وأعيش بفهم الزولة السوية، ما اخدت نفسي انو انا زولة معاقة وسط الناس السويين بالعكس انا السوية وهم المعاقون، لانو ممكن يكون عندهم قصور في التفكير أو السمع أو الاحساس بالناس، ودي حاجات انا ما عندي، اتعاملت عادي اشوف او ما اشوف دي ما مشكلة.
يعنى عنك شكل محدد للحاجات؟
- «تبتسم» فى ذاكرتى ما فى صورة زول فى صورة طيور، لانى كنت بحب الطيور وانا صغيرة جدا بعاين لمنظرها وهى بتحلق فى السماء وبتذكرنى كلام حبوبتى عن عظمة الله.
صحي آمال النور وحنان النيل هم السبب فى انك تغنى لانهم مكفوفين وبيغنن؟
- ما فى زول بيكون السبب فى حاجة بيعملها زول تانى، طالما الحاجة عملتها انت يبقى ما فى زول السبب، لو كانوا وهبوا كل المكفوفين اصواتا جميلة كنا ملينا الساحة الفنية، وما خلينا زول يغنى معانا.. نعمة الصوت دى هبة من ربنا ما عندها علاقة بشخصيات محددة او بقصور او مشكلة نفسية.
بتحبى تغنى للعيون؟
- بحب اغنى ليها لكن ما عشان سبب محدد، بس لانو الشِّعر جميل وبيتغنى، ممكن اغنى للشَّعر او الخدود بنفس الكيفية طلما الكلمات والالحان متميزة.
لو خيروك يشيلوا صوتك ويدوك نظر؟
(تجيب بحسم وسرعة) لا.. لا ما بقبل لانو نظرى حا يخدمنى براى، لكن صوتى بيسعد شعب ومجتمع وعندو رسالة لو انا فتحت انتو حا تستفيدو شنو!